Report TV -Liruan të dënuarin për drogë nga qelia/ Pushohet akuza për kryekomisarin

Hetimi për lirimin nga ambientet e komisariatit të Kukësit të kosovarit Naser Gashi, i dënuar me 7.4 vite burgim për trafik droge, ka përfunduar në gjykatë me vetëm një të pandehur. Kujtim Spahia, një efektiv policie me detyrë specialist i Policimit në Komunitet, është marrë i pandehur nga prokuroria e Lezhës, për këtë rast të lirimin nga dhomat e shoqërimit të një trafikanti droge, i cili u kap në kufirin e Morinës, teksa kërkonte të kalonte nga Shqipëria në drejtim të Kosovës.

Ndërkohë ndjekja penale është pushuar për ish-shefin e komisariatit të Kukësit, Agim Basha, dhe dy policët e tjerë, Shkëlzen Ibaj dhe Ferdinand Gjeta. Nga ky hetim ka shpëtuar dhe prokurorja e Kukësit, Rita Gjati, e cila në rrethana të dyshimta dhe krejt të paqarta firmosi lirimin e Naser Gashit.