Report TV -Korça 'pushtohet' nga dëbora, nuk ka akse të bllokuara

Ulja e temperaturave është shoqëruar me reshje të dendura dëbore në qarkun e Korçës. Bora që vijon të bjerë prej disa orësh ka arritur një trashësi në qytet nga 5-7 centimetra. Në zonat malore të Dardhës, Qafës së Qarrit,Voskopojës dhe Vithkuqit trashësia e dëborës ka shkuar në 25-30 centimetra, ndërsa janë shoqëruar me erë të fortë.

Deri tani nuk raportohet për rrugë të bllokuara apo zona të izoluara, ndërsa policia rekomandon që rrugën për të shkuar në Dardhë të përdoren zinxhirët nga drejtuesit e mjeteve.

Përkeqësimi i motit ka bërë që firmat kontraktore të nxjerrin në terren borëpastrueset dhe të bëjnë kriposjen e rrugëve.