Pas takimit që Rama pati me ambasadorët e vendeve të BE ditën e sotme, reagimi i parë erdhi nga ambasadori i OSBE Bernd Boschardt, i cili tha se u takon institucioneve shqiptare te zgjedhin cila palë ka argumentet më të mira ligjore. Sipas kryediplomatit, cfarë po ndodh është cështje mes Parlamentit, Kushtetutës dhe Gjykatës Kushtetuese.

***

Ambasadori i OSBE-së në vendin tonë Bernd Boschardt thotë se deklarata e Presidenti Ilir Meta për të anuluar zgjedhjet është çështje e brendshme, dhe nëse do të ketë apo jo zgjedhje më 30 qershor, kryediplomati thote se do të jenë institucionet shqiptare që do të zgjedhin se cila palë ka argumentet më të mira ligjore.

Ai thotë se çfarë po ndodh është çështje e brendshme e Shqipërisë, mes parlamentit, Kushtetutës, dhe më pas Gjykatës Kushtetuese. Ambasadori i OSBE-së u pyet nga gazetarët edhe për protestat e opozitës joparlamentare, ku tha se përgjegjësia për dhunën në tubime bie vetëm mbi organizatorët.

Prononcimi për mediat

Cili është qëndrimi juaj lidhur me anulimin e datës së zgjedhjeve nga Presidenti?

Kryetari i Radhës i OSBE-së bëri një deklaratë shumë të qartë për këtë javën e shkuar. Ai tha se vendosja e datës së zgjedhjeve është çështje e brendshme e Shqipërisë. Tani, është çështje e debatit të brendshëm. Kam besimin se institucionet shqiptare do të gjejnë një vendim të mençur se cila palë ka argumentin më të mirë ligjor.