U fut për të ndaluar shoqërimin e ish-deputetes së LSI-së, Alfred Lela rrëfen dhunën e policisë

Në një prononcim për Report Tv gazetari Alfred Lela rrëfeu si u gjend mes policëve dhe si ndodhi shoqërimi. Lela tha se ishte në punën e tij si gazetar, por në një moment ndërhyri kur po shoqërohej Silva Caka, ish-deputete e LSI-së për t'ju thënë policëve se nuk kishte bërë asgjë, pa e ditur se kush ishte, sipas tij. Ai akuzoi policët për dhunë, ndërsa ndryshe ishte situata në komisariat.

Prononcimi për Report Tv i Alfred Lelës
Si je me shëndet?
Jam më mirë, qafën kam me probleme për ta lëvizur, por mirë do të thoja.

Çfarë ndodhi, policët ishit në dijeni se ishit person i medias?
Të gënjej të them se cfarë menduan policët. Duam apo nuk duam jam portreti njohur, jam edhe qeros dhe i pangatërrueshëm. Dyshoj që të ketë qenë ngatërresë. Sot ka pasur arrestime edhe më të dhunshme se i imi. Kam përshtypjen se edhe mos e kishin kuptuar në atë moment, policia më ka bërë një xhiro të plotë rreth bllokut të godinave të ministrisë dhe jam vonuar për 5 minuta se nuk dinin ku do të më çonin. Ku ta çojmë, thoshte njëri dhe tjetri. Dhe për 5 minuta qëndrova te sheshi i teatrit për një vendim. E kishin kohën për të më njohur. Nuk besoj se ishte mosnjohja, do u uroja, por nuk ishte ajo.