Aliu: Marrëdhëniet Kosovë-Shqipëri simbolike...s'e duam flamurin kosovar, do punojmë për bashkimin

Për një nga themeluesit e 'Lëvizjes Vetëvendosje', Liburn Aliu, marrëdhënia Kosovë-Shqipëri është më tepër simbolike se konkrete. Kjo sipas tij, do të marrë fund me 'Vetëvendosjen' në pushtet, ku theksoi se do të punohet për bashkimin e Shqipërisë dhe Kosovës.

"Ka shumë marrëveshje që janë nënshkruar Shqipëri dhe Kosovë dhe ka shumë marrëdhënie që duhet të bëhen. Kanë qenë më shumë simbolike, spektakël, konkretisht ka qenë shumë e varfër. Kosova gjithmonë është varë nga Shqipëria, por edhe Kosova mund të japë shumë për Shqipërinë. Të gjitha barrierat që kemi me Shqipërinë duhet të thyhen. Pse patatja duhet të hidhet në lumë, apo pagesa në doganë e rrugë...këto duhet të hiqen. Ne nuk jemi pajtuar me Plani i Ahtisarit, me Kushtetutën e Kosovës dhe ne synojmë që këto të ndryshohen. Kemi ideale bashkimin e Kosovës dhe Shqipërisë. Asnjë veprim nuk e bën me këtë ideal. Çdo punë e jonë në sinkron me këtë synim. Synojmë një kombëtare, një flamur. Nuk kam pse ta dua flamurin e Kosovës, por do e respektojmë ligjërisht. Të themi se do të mbyllemi në shtetin e Kosovës dhe nuk do të bashkohemi kurrë, nuk do e kemi këtë mendim. Ndoshta sot është e pamundur që të bëhet një gjë e tillë. Të bëjmë propagandë të duam një flamur që na imponon dhe nuk ka të bëjmë me identitetin kombëtar, nuk e bëjmë. Ndërkombëtarët na kanë bërë që të jemi të ndarë, por nuk kemi pse të ndalojmë së menduari se do të bashkohemi me Shqipërinë", tha Aliu.