Report Tv-Studentët pas fjalimit të Ramës: Dakord me heqjen e tarifës për të varfrit

Në momentin kur kryeministri Edi Rama po zhvillonte komunikimin 'live' në Facebook (Lexo këtu), te protesta përpara Ministrisë së Arsimit është vendosur një ekran, por ai është hequr nga studentët. Ata e kanë ndjekur fjalimin e kryeministrit përmes rrjeteve sociale. Edhe pse kryeministri Edi Rama tejkaloi kërkesat e tyre duke vendosur subvencionimin 100% të tarifës për studentët ekselentë dhe ata që vijnë nga familje me ndihmë ekonomike, modernizimin e konvikteve, shkarkimin e bordit të administrimit të universiteteve apo dhe punësimin e studentëve të shkëlqyer pa konkurse në administratë, sërish studentët kanë refuzuar thirrjen për dialog.

Ata kanë qenë të prerë në përgjigjen e tyre se nuk do të ketë dialog, pasi kërkesat e tyre janë të panegociueshme. Ata janë shprehur se nuk do të ngrejnë përfaqësi nga radhët e tyre për të dialoguar me kryeministrin. Nga protesta përpara Ministrisë së Arsimit studentët i kanë kërkuar kryeministrit përmbushjen e të gjitha pikave të tyre, pa qenë nevoja për negociata apo dialog.

Studente: Mesa di unë si studente, janë paraqitur tetë pika. është kërkuar 50% e tarifës. Nëse kjo është thënë nga kryeministri, më mirë akoma. Por nëse plotësohen kërkesat mirë, nëse jo vijon protesta.

Studente: I thoni z.Rama që jemi shumë të lumtur, por kemi edhe 7 kërkesa të tjera. Nuk jemi grup, unë dua të përfaqësoj veten, edhe una dua të jem atje (në takim).

Student: Të flasë edhe për shtatë pikat e tjera. Nuk janë vetëm këto, është edhe mesatarja që kemi kërkuar të hiqet. Nuk ka dialog.

(Nuk duam bisedime), studentët thërrasin në kor.

Student: Nuk ka dialog dhe negociata.

Studente: Në momentin kur nuk shohim plotësimin e këtyre 8 pikave nuk shohim vend për dialog dhe as negociata.

Student: Nuk duam marrëveshje. Nuk duam marrëveshje dialoguese, por plotësim të kërkesave.