Report TV - Kuvend: Balla: Reformën në Drejtësi, s'ka forcë politike që ta ndalë

Kreu i grupit parlamentar të PS, Taulant Balla, e ka cilësuar një shfaqje të turpshme protestën e opozitës në seancën e fundit plenare për vitin 2017, ku u zgjodh prokurorja e përgjithshme, Arta Marku.

Balla tha në foltoren e Kuvendit, në nisje të sesionit të ri parlamentar, se çizmet, shishet dhe togjet e letrave të punës, tymueset, ulërimat histerike, nuk kanë lidhje me parlamentarizmin. Deputeti socialist i kërkoi opozitës të bashkohet për të bashkëpunuar mbi reformën në drejtësi, duke shtuar se PS nuk do të ndalet deri në zbatimin e saj, si dhe të integrimit të Shqipërisë në BE.
"Fjalimet ngjanin si një i vetëm dhe ishin të përqendruara te seanca e fundit e 2017. Bashkohem me ju në vlerësimin që seanca e fundit ishte një shfaqje e turpshme dhe që nuk duhet përsëritur. Çizmet, shishet dhe togjet e letrave të punës, tymueset, ulërimat histerike nuk kanë lidhje me parlamentarizmin. Turpi gjithmonë dhe asnjëherë nuk është kolektiv. Përgjegjësia është individuale, turpin le ta mbajë kush e ka dhe kush nuk di ta mbajë le të paguajë gjyqin e opinionit publik. Seanca e fundit ishte shfaqja më e turpshme, opozita ia la për ta paguar populli shqiptar. Ajo ofron vizion dhune, që nuk ka të përbashkët me Evropën.