Kartika Deepotsavam 2024 : కార్తికమాసం చివరిసోమవారం ఈటీవీ చేపట్టిన కార్తిక దీపోత్సవం.. కన్నుల పండువగా జరిగింది. ఈటీవీ లైఫ్, ఈటీవీ తెలంగాణ, ఈటీవీ ఆంధ్రప్రదేశ్ సంయుక్తంగా హైదరాబాద్ సరూర్ నగర్ ఇండోర్ స్టేడియంలో నిర్వహించిన దీపోత్సవంతో ఆధ్యాత్మిక వాతావరణ వెల్లువిరిసింది. వేద పండితుల మంత్రోచ్చరణలు, ప్రవచనకర్తల ఆధ్యాత్మిక ప్రసంగాలతో కార్యక్రమం ఆద్యంతం భక్తి పారవశ్యంతో సాగింది. దీపోత్సవంలో పెద్ద సంఖ్యలో పాల్గొన్న మహిళలు.. పరమశివుని స్తోత్రించి దీపాలు వెలిగించి తన్మయత్వంలో మునిగిపోయారు. భాగ్యనగర వాసుల్లో ఆధ్యాత్మికతను తట్టిలేపింది. వందలాది భక్తుల శివనామస్మరణతో స్టేడియం మారుమోగింది. సోమవారం సాయంత్రం 5 గంటల నుంచి రాత్రి 8 గంటల వరకు భక్తుల కోలాహలం నడుమ శివకేశవులతో సహా అమ్మవారికి ప్రత్యేక పూజలు నిర్వహించారు.
