TIRANE-Opozita parlamentare i kërkon shumicës socialiste që të ulen në një tryezë dhe të diskutojnë për reformën zgjedhore dhe dy kushtet e tyre, depolitizimin e administratës zgjedhore dhe listat e hapura, në të kundërt nuk do ta votojnë në Kuvend, madje as nuk do të futen në seancë ditën që do të votohet për të shmangur kështu rrjedhjet e mundshme. Në letrën, drejtuar kryetarit të Kuvendit Gramoz Ruçi dhe kryeministrit Edi Rama, tre kryetarët e grupeve parlamentare të opozitës, Myslim Murrizi, Nimet Musai dhe Edmond Stojku kërkojnë që tryeza të zhvillohet brenda 48 orëve. Opozita parlamentare kërkon që në tryezën e dialogut të jetë i pranishëm vetë kryeministri Edi Rama. Opozita parlamentare u thirr në një takim ditën e shtunë edhe ngë ambasadorja amerikane dhe i BE-së, por tre kryetarët e grupeve deklaruan të vendosur se nuk do ta votojnë reformën pa plotësuar kushtet e tyre. Tashmë mbetet për t'u parë si do të reagojë shumica, e cila e vetme ka 77 vota në parlament nga 84 që duhen për reformën zgjedhore.