'కేసులకు నేనేం భయపడటం లేదు' - మళ్లీ ఆర్జీవీ వివాదాస్పద వీడియో రిలీజ్

Ram Gopal Varma : సామాజిక మాధ్యమాల్లో అసభ్యకర పోస్టులు పెట్టారని వివాదాస్పద దర్శకుడు రాం​ గోపాల్​ వర్మపై ఆంధ్రప్రదేశ్​లో కేసు నమోదైంది. ఈ కేసులో తప్పించుకొని తిరుగుతున్న ఆర్జీవీని ఏపీ పోలీసులు గాలిస్తున్న విషయం తెలిసిందే. ఇందుకు సంబంధించి ఆర్జీవీ ఓ వీడియోను విడుదల చేశారు. ఈ కేసులకు తానేం భయపడటం లేదని వీడియోలో తెలిపారు. ఏడాది క్రితం పెట్టిన ఏవో ట్వీట్స్​ వల్ల ఎవరి మనోభావాలు దెబ్బతిన్నాయని అని అన్నారు. తాను ట్వీట్స్​ పెట్టిన వారికి కాకుండా సంబంధం లేని వారి మనోభావాలు దెబ్బతింటే ఈ కేసులు, సెక్షన్లు ఎలా వర్తిస్తాయని ప్రశ్నించారు.

ప్రస్తుతం రాజకీయ నాయకులు పోలీసులను ఆయుధంగా చేసుకొని పాలన చేస్తున్నారని వివాదాస్పద దర్శకుడు ఆర్జీవీ మండిపడ్డారు. అమెరికా, యూరప్​లో లాగే ఇక్కడ అదే జరుగుతుందని వ్యాఖ్యానించారు. ప్రస్తుతం ఓ మూవీ షూటింగ్​లో ఉన్నానని.. నిర్మాతకు నష్టం వస్తుందనే విచారణకు రాలేకపోతున్నానని తెలిపారు. అయినా హత్యలు, ఇతర కేసులకు సంవత్సరాలు సమయం తీసుకుని.. ఈ కేసు విచారణకు ఇంత అత్యవసరం ఏంటని ఆర్జీవీ వీడియోలో ప్రశ్నించారు.