Filmi vizatimor ?Legjenda e vendit t`shejt? është në fazën e postproduksionit. Filmi vizatimor flet për legjendën e kishës së Laçit, kisha e Shna Ndojt. Është hera e parë që legjendat epike realizohen në një film vizatimor. Për të folur më tepër për realizimin e këtij filmi në programin ?Rudina?, në TV Klan ishin të ftuar regjisorja dhe skenaristja Eliona Thomanaj, piktori animator Bledar Gërcaliu dhe Zbatuese e animacionit dhe ngjyruese Ronida Myrtaj.

Legjenda e kishës së Laçit thotë se veglat fluturonin nga qyteza e Sebastes, Laçi i sotëm, tek kodra ku ndodhet aktualisht kisha e Shna Ndojt, prandaj njerëzit pasi hasën në këtë mrekulli vendosën ta ndërtonin kishën jashtë mureve të kalasë së Sebastes.

Në këtë film vizatimor janë ndërthurur faktet historike me legjendën. Skenari është krijuar nga një legjendë dhe pastaj janë krijuar personazhe në skulpturë 3D. Në bazë të saj është krijuar konstumografia, janë veshur aktorët dhe janë krijuar skena të ndryshme sipas skenarit të filmit. Në bazë të këtyre skenave janë krijuar vizatimet.

Teknika e filmit është bazuar në xhirimin e aktorëve dhe në bazë të xhirimeve të tyre është kthyer në animacion. Kjo është një teknikë që nuk është përdorur më parë nga animacioni në vendin tonë.