Ambasadori i BE-së në Tiranë, Luigi Soreca i ka dorëzuar kryeministrit Edi Rama rekomandimin pozitiv të Komisionit Europian për hapjen e negociatave. Diplomati i BE-së ka vlerësuar reformat e ndërmarra nga Shqipëria, sidomos atë në drejtësi, ndërsa ka inkurajuar dy palët qeverinë dhe opozitën që të bëjnë një pakt për cështjen e integrimit për të bindur vendet e BE-së në marrjen e vendimit.

Kryeministri Edi Rama në fjalën e tij u shpreh se progres raporti pozitiv dhe rekomandimi për hapjen e negociatave nuk ishte surprizë, pasi Shqipëria i ka bërë të gjitha detyrat, ndërsa shtoi se tani vendimi është politik dhe për këtë i kërkoi opozitës që deri në marrjen e vendimit të mos mendojnë për partinë, por për Shqipërinë.

"Nëse opozita s'do ishte në rrugë, i bindur që KiE do na jepte një vendim pozitiv" u shpreh Rama ndër të tjera. I pyetur për gatishmërinë e Presidentit Ilir Meta për shtyrë datën e zgjedhjeve, Rama u shpreh i prerë 'Jo', pasi sipas tij 30 Qershori nuk negociohet.