صفحة البرنامج
https://www.facebook.com/ElkoraMshM33fify
كتابة وتعليق: أحمد عفيفي
https://twitter.com/Ahmed1Afify
https://www.facebook.com/ahmed.afify.549
مونتاج وإخراج: محمد مجدي
http://www.youtube.com/user/forzamalek1911
https://twitter.com/kanzaman_4my
https://www.facebook.com/mohammedmagdi.k.z

باقوى هجوم و اقوى دفاع و رقم قياسي في تحصل النقاط و في مرات الفوز الزمالك ينفرد بدور الكبير اوي تاركاً للآخرين حرية الأختيار بين دوري أشرف و حزلقوم

فيريرا بياخد ريسك الدفع بالتشكيلة الأساسية متجاهلا هاجس الأنذارات في رسالة غير مباشرة للجميع ان الماتش مفيهوش هزار .. تنبيه صارم على اللعب السهل بتحريك الكوره اطول وقت ممكن تجنباً للأرهاق و الأصابات و الأنذارات .. ماتش على سهولته لكنه يعكس سيطرة نفسيه و فنيه و تكتيكيه مبهره من فيريرا على كل تفاصيل الفريق .. فيريرا بيرسم الخطوط و اللاعيبه بيعيشوا جوه الحدود دون الخروج سنتي واحد براها لأن اللي بيخرج بيندم

الجولين التالت و الرابع نموذج للتحول من الدفاع للهجوم .. لما تحط مهارة باسم في الترقيص مع ملية الكوره في وش رجله الداخلي جنب مع مهارة دي معروف يوسف في لمه و التانيه و اللونج باص الهايل جنب قرصة مصطفى فتحي ع الكوره عكس اتجاه المدافع و الزياده بيها اللي ساعده فيها تحرك خالد قمر على القريبه برضه و تحطهم كلهم في لوحه واحده تعرف انك بتتكلم عن اقوى فريق في افريقيا اللي ميفرقش معاه اي ماتش راح او جاي و اللي في حالته يدوس اي حد

باسم مرسي بدأ الموسم المهاجم الرابع .. نزل و خرج تاني .. اتشكك فيه من قبل ما يبدأ و اتقال جبنا التروماي .. لا عيط و لا اتصعبن و اتشحتف ولا اشتكى ولا نفسن في التغييرات ولا ميس ع الجمهور .. اشتغل .. طوع الظروف لخدمته فخدمته .. لو كل لاعيب مشي طريق باسم هينجح لأن ده طريق النجاح الوحيد .. اي طريق تاني يا فشل مباشر يا نجاح مؤقت ثم فشل
توقعت من طلبه اقل و اداني اكتر توقعت من خالد قمر و احمد سمير كتير و خذلوني توقعت من كوفي اداء كبير و كالعاده كان كبير .. بعد الأسماعيلي و اورلاندو توقعت ترييحه من معروف يوسف فكان رجل المباراة

محمد عادل جمعه + ايراسموس + كهربا و أحمد رفعت + محمد ابراهيم + باك ليفت كمان و واحد من احمد حسن مكي او وائل فراج ممكن يكونوا كافيين جداً لموسم انتقالاات ناجح ناضج مفيد لو حطيت عليهم كمان شيكابالا و اديته فرصه عمرة الأخيره مع الحفاظ على الفريق بجهازه الفني فانت بتحافظ على مكانك بعيد جداً عن اي منافس

قبل الديربي في نقطه صغيره .. انا عارف التزام فيريرا الصارم بدفاع المنطقه لحظة بناء الخصم للهجمه لكن قدام الأهلي في تفصيلة صغيره شبة تفصيلة صغيرة برضه قرفتنا في ماتش المقاصه .. صانع الألعاب المتأخر اللي كان في المقاصه هاني سعيد و اللي في الأهلي حسام غالي .. اضغط على حسام غالي و اعزله عن بناء هجمات الأهلي هيفكوا منك

بالمناسبة .. انا جيت اسلملك ع الصفقات لقيتهم بيحتفلوا و مولعين شماريخ ..ابقى سلم انت عليهم يوم 21 بقى .. بس اوعي يقولك تعالى ندور ع الجنيه في الجنينه تصدقهم