Sezoni turistik bën bashkë policinë e Sarandës dhe Strugës

Në kuadrin e zbatimit të Protokollit të Bashkëpunimit ndërmjet Ministrisë së Punëve të Brendshme të Republikës së Shqipërisë dhe Ministrisë së Punëve të Brendshme të Republikës së Maqedonisë përgjatë sezonit turistik, protokoll ky, i cili është firmosur më datë 5 shtator 2014, në Sarandë dhe në Strugë po kryejnë shërbim punonjës të dy policive përkatëse.

"Ky bashkëpunim ka për qëllim rritjen e parametrave të sigurisë në të dy vendet, shkëmbimin e përvojave mes dy policive për përballimin e flukseve turistike, krijimin e një impakti pozitiv tek qytetarët respektivë, si dhe ardhjen në ndihhmë të turistëve dhe pushuesve nga të dy vendet", thuhet në një njoftim për mediat nga Policia e Shtetit.

Zbatimi i këtij protokolli, sipas policisë, ka dhënë frytet e para ku qytetarët e të dy vendeve janë shprehur të kënaqur nga prezenca e Policisë së vendit të tyre duke u ndjerë më të sigurt. Kjo tregon se ky bashkëpunim duhet të shtrihet përgjatë gjithë vitit, kryesisht në zonat turistike./tvklan.al