قلب واحد | مسحراتي المدار

#المدار #فؤاد_حداد #قلب_واحد
إلقاء: وائل فتحي
شعر: فؤاد حداد
القصيدة كاملة:
اصحى يا نايم وحّد الدايم
وقول نويت بكره ان حييت
الشهر صايم والفجر قايم
اصحى يا نايم وحّد الرزاق
رمضان كريم
مسـحـراتى فى ليالى خير
مـنـقراتى على خط سير
بقلب واحد فقط لاغير
آه يا حبايبي
الكل جنبي
من يوم ما باحبي
وانا المتيم
بحر المراكبي
خلانى أحلم
آخد فى دربي
كل الموالد
وحياتى والد
على قلب واحد فقط لا غير
شهيد وفجري
يحيى الضحيه
يا سين واجري
نظره بهيه
أدور وأجري
ومصر هيه
طيرى وشجرى
من ألف طير
لقيتنى وارد
على الموارد
بقلب واحد فقط لا غير
وان كنت شاعر
شوف البشاير
قالت عوافى
ورمت لى ورده
دليل طوافى
عطر الموده
كل القوافي
من كلمه واحده
وقلب واحد فقط لا غير
والمشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
الحمد لله رزقنى الفجر بالمواعيد
وبدع فى قلبى وخيالى ألف وقفة عيد
وشمس تملا الليالى ولو مكانها بعيد
ما اعرفش إيه اللى كان على خدى بيندى
مشيت انا خطوه والتانيه لقيتنى سعيد
اصـحى يا نايم وحّد الدايم
السعىُ للصوم خيرٌ من النوم
دى ليالى سمحه نجومها سبحه
اصـحى يا نايم.. يا نايم اصحى
وحّد الرزاق
تابعوا قناتنا علي اليوتيوب من هنا .. https://bit.ly/39eP5wY
تابعونا علي الفيس بوك من هنا .. https://www.facebook.com/elmadartv
تابعونا علي تويتر من هنا.. https://twitter.com/elmadartv
تابعونا على إنستجرام من هنا.. https://www.instagram.com/elmadartv/