كتب وناس | مسحراتي المدار

#المدار #فؤاد_حداد #المسحراتي


شعر: فؤاد حداد
إلقاء: وائل فتحي
القصيدة كاملة :
اصحى يا نايم وحّد الدايم
وقول نويت بكره ان حييت
الشهر صايم والفجر قايم
اصحى يا نايم وحّد الرزاق
رمضان كريم
مســحـراتى قديم جديد
مـنـقـراتى خفيف شديد
فاتح مدارس ساعة السحور
وطبلتى طبلة الحضور
خدت الثقافه على أساس
ان الثقافه كتب وناس
قريت لطه وللحكيم
ولعم بيرم وللنديم
ومن المعره على بولاق
أبو العلا من أبو العلاء
شفت الجميل يشكر الجميل
فى كل حته وفى كل جيل
من فننا جاءت الفنون
من شاعرٍ جاءَ شاعرون
ومن تراثٍ لنا عريق
شيوخ أوروبا على الطريق
ومشيت فى شارع نور الظلام
وشفت لك يا عبد السلام
اكمنى راجل زيّك أمير
الفجر أبيض زى الضمير
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطـرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
قلت المحبه وقلت المعرفه قسمه
وخدت عودى وكان عودى ربيع نسمه
أصبحه بالليالى ويجرى فى النجمه
أنا قريت البلد والفجر والإنسان
وأنا اتبّعت الضحى وحدثت بالنعمه
اصـحى يانايم وحّد الدايم
السعىُ للصوم خيرٌ من النوم
دى ليالى سمحه نجومها سبحه
اصـحى يانايم.. يانايم اصحى
وحّد الرزاق


تابعوا قناتنا علي اليوتيوب من هنا .. https://bit.ly/39eP5wY

تابعونا علي الفيس بوك من هنا .. https://www.facebook.com/elmadartv
تابعونا علي تويتر من هنا.. https://twitter.com/elmadartv
تابعونا على إنستجرام من هنا.. https://www.instagram.com/elmadartv/