شيلني و اشيلك دنا برضو فرحت لك و أنا بتاعك يا بيه و أعرف ما أعرفش ليه و كام عبد المعين لابد ف المسؤولين و أنا بتاع كل حاجة و دراعك اليمين و سواق المدير و هتيف الوزير و مهماز المدام و نبوت الغفير و فراش العيادة و خدام السيادة للي من غير سنادة يثعكز ع السرير و ناس بدم ساقع واقفين وراء البراقع يميعوا المباديء يضيعوا الشرائع و ناس من خلف شيش خايفين من الشاويش سلبية الميه الميه تعالى ... لا ما أجيش دا كان كلام زمان ما يبقالوش مكان ف مجتمع نضال بيعجن الرجال بالصهد و العرق و لو حس الألم يوشوش القلم يصرخ ع الورق يقول كل الكلام عريان ما يزوقوش و يوصف الالام للي ما تألموش أصل احنا شعب طيب و الطيبة فينا بلوة تاخدنا من قريب و تجيبنا كلمة حلوة سامعين يا أهل البلد و لا امسك النفير يا البنت يا الولد يا المجدع الكبير عارفين ماشيين منين و السكة السالكة فين ؟ مشوارنا مش هوين و ما هواش بالقليل مهما الخيال يزين لسا الطريق طويل عايزين همة رجال أبعد من المحال و أسرع من الأمل تزلزل الجبال و تخلق المجال للعدل والعمل و يطلع خير بلادنا على ذمة ولادنا و تبقى عيشة جنة و ملو الصحن حنة على كفوف الصبايا و اعيش و أشوف ولادي مالين عين الأعادي قايمين للعز راية و اقعد ويا الصحابة و نقول على الربابة يا جيل الأنجازات يا جيل المحظوظين أبوك السقا مات
