السادة المحترمون: كلام مرسي كتير ومابنشوفش منه حاجة والدليل حق شهداء رفح اللي مجاش

عموما ، هم دول الإخوان خانوا العهد مع الجميع حتى مع أقرب حلفائهم وهم السلفيين ، وطالما بنكلم عن الدكتور مرسى اللى عمره ما بيرجع فى كلمته واللى كلمته دايما سيف على رقبته ، وطالما كمان بنحتفل بذكرى تحرير سيناء ، ما تيجو نشوف الدكتور مرسى عمل ايه فى جريمة مقتل جنودنا على الحدود فى 5 أغسطس 2012 ، ما شفناش يعنى حد اتقبض عليه ، ولا دم ولادنا واخواتنا هيروح هدر يادكتور مرسى ، عاوزين حق جنودنا اللى ماتوا ، مين اللى قتلهم وليه مفيش كلام عن اللى قتلهم ، خايفين من ايه ، هل فعلا اللى نفذوا العملية من غزة ولو من غزة ليه خايف تعلنها يادكتور مرسى.
خلونا الأول نشوف أول رد فعل للدكتور مرسى عقب اعلان عمليه رفح الارهابية فى 5 أغسطس 2012 ، واللى أكد أن دماء هؤلاء الشهداء لن تضيع هدرا وسيرى المجرمون ما سنفعل !!
تسع شهور مروا يادكتور مرسى وما شفناش حاجة وما عرفناش من اللى قتل جنودنا ، على كلامك يوم الحادث واللى سمعناه دلوقتى انك أصدرت الأوامر لإلقاء القبض على القتله ، وان الحادث لن يمر بسهوله ، طب فين بقى ، شهر ورا شهر بيعدى وما شفناش يعنى الرئاسة أعلنت عن المتورطين الحقيقيين فى الحادث ، وشايفين الدكتور مرسى كلامة بإيه ""غدا سيرى هؤلاء المجرمين رد الفعل على ما حدث ""- ما هو واضح ياريس واضح فعلا.
تابعونا على صفحتنا http://www.facebook.com/alSadahalMo7taramon