بلدنا بالمصري: بالضبطية .. الإخوان قبضوا على ٤ أطفال

حسن مصطفى مش الاول وغالباً لسة مش هيكون الاخير.. بس هي اكيد ديه شدة وهتزول وهيكون لها اخر.. لكن لحد ما تزول فاحنا بالتاكيد في شدة..... في حلقة امبارح حكينا لحضراتكوا سريعاً جداً عن واقعتين حصلوا واحدة اول امبارح بالليل والتانية امبارح الصبح والاتنين تم الربط تلقائياً بينهم وبين بيان النيابة العامة اللي اتفسر على انه منح الضبطية القضائية للمواطنين.. الاولى واقعة القبض على عدد من الشباب من محيط مقر جماعة الاخوان في المقطم.. وفي روايتين رواية رسمية على عهدة مصدر امني بتقول ان الشرطة هي اللي قبضت عليهم بتهمة الاعتدء على المقر ومحاولة حرقه بازازات المولوتوف اللي كانت معاهم.. والرواية التانية ومن ضمنها رواية حزب الدستور، اللي تم القبض على احد اعضاءه في القبضة ديه، بتقول انهم كانوا في مظاهرة سلمية ضد حكم الاخوان وان مواطنين زيهم بس الفرق انهم من اعضاء الجماعة هم اللي قبضوا عليهم وسلموهم للشرطة.. والواقعة التانية حصلت للنشطة منى عبد الكريم من اعضاء التيار الشعبي.. كانت ماشية في امانة الله جم اتنين مواطنين قبضوا عليها وسلموها لقسم شبرا.. الجديد النهاردة بقة.. او من ضمن الجديد ودة حسب بيان صادر النهاردة من الائتلاف المصري لحقوق الطفل ان من ضمن اللي قبض عليهم المواطنين الشرفاء في المقطم: ٤ اطفال