من جديد: التأسيسية .. هتتحل ولا مش هتتحل
- 12 years ago
السلام والتحية على حضراتكو واهلا بيكو معانا ... النهاردة حسينا ان كل طرف قاعد بيجهز نفسه ليوم التلات اللي جاي .. اليوم اللي اتحدد لنظر الطعون على تشكيل الجمعية التاسيسية لوضع الدستور الجديد واللى قد يصدر فيه حكم جديد ببطلان الجمعية الحالية واللى طبعا وقتها هيزيد الطين بلة وهيدخلنا اكتر في المتاهة القانونية اللى احنا عايشنها لأن طبعا وقتها وفقا للإعلان الدستوري المكمل فالمجلس العسكري هو اللى هيشكل الجمعية التأسيسية الجديدة واللى هتكون وقتها طبعا رقم 3 ... لكن النهاردة فوجئنا بقرار جديد للدكتور محمد مرسي رئيس الجمهورية بالتصديق على قانون انتخاب اعضاء الجمعية التأسيسية للدستور، مش كدة وبس ده كمان أعضاء الشورى اتقدموا باستقالتهم من عضوية التأسيسية عشان قطع الطريق على حلها زي المرة اللي فاتت .. هل دا معناه انه خلاص كدا الجمعية مينفعش يطعن عليها ولا لاء .. هل بكدة الجمعية التأسيسية نجت من الحل أم هي في طريقها للحل .. دا اللى هنعرفهة في فقرتنا الأخيرة النهاردة، اما دلوقتي فخلونا نروح نشوف مصر حصل فيها اية النهاردة ونرجع لحضراتكو من جديد..