من جديد: انتهى صراع الأشخاص وبدأ صراع المؤسسات

يمكن باعلان النتيجة نقدر نقول ان صراع الأشخاص انتهى وحنبتدي صراع المؤسسات، صراع ما بين المؤسسة الرئاسة والحكومة من ناحية وعلى الناحية التانية حيكون المجلس العسكري واللي لسه محتفظ بالسلطة التشريعية، يمكن الصراع ده مش حيبان جزء كبير منه للإعلام زي اللحظات الأخيرة أو الأيام الأخيرة اللي سبقت إعلان النتيجة في مصر اللي ممكن نعرف منها حاجات الأيام اللي جاية، لكن المهم في الصراع ده ان القوى المدنية تستفيد منه وتعرف ازاي تحقق أكبر مصلحة ليها خلال الأيام اللي جاية، الإخوان قدامهم فرصة تاريخية للمصالحة الوطنية، لو ضاعت الفرصة ديه كلنا خسرانين والإخوان حيخسروا اكتر. بالرغم من ان القوى المدنية ممكن يكون وزنها النسبي مش زي الإخوان وأكيد مش زي المؤسسة العسكرية إلا أنها زي الريشة اللي ممكن ترجح كفة عن كفة ، وهنا الجيم حيكون بين الإخوان والعسكري على مين اللي حيكسب القوى المدنية، لإن الإخوان عاوزين يأكدوا ان مرسي رئيس عنده شرعية تآييد الشارع والصندوق وتآييد القوى المدنية، وفي المقابل المجلس العسكري حيكون في مصلحته وجود القوى المدنية جانبه ، عشان معركة الدستور وشكل الدولة اللي اكيد حتكون معركة كبيرة حنشوفها كلنا خلال الأيام اللي جاية.