हिंजवडीत झाडावर मृतदेह; आयुक्त कृष्णप्रकाश स्वतः घटनास्थळी आणि काही तासात गूढ उकललं

पिंपरी चिंचवडचे पोलीस आयुक्त कृष्णप्रकाश यांनी एखाद्या प्रकरणात लक्ष घातलं आणि ते अपूर्ण राहिलं असं कधी सहसा होत नाही. असंच एक आव्हानात्मक प्रकरण पिंपरी चिंचवड पोलिसांसमोर आलं होतं. पण खुद्द आयुक्तांनी यात लक्ष घातलं आणि काही तासात अशा एका घटनेचं गूढ त्यांनी उकललंय, ज्याबाबत पोलिसांच्या हाती काहीही माहिती नव्हती. हिंजवडी परिसरात मुळा नदीच्या काठावर एका झाडावर लटकलेल्या अवस्थेत आढळून आलेल्या मृतदेहाने पिंपरी-चिंचवड परिसरात खळबळ उडाली होती. हा मृतदेह बऱ्याच दिवसांपासून या झाडाला लटकलेला असल्याने त्याचे सर्व मास कुजून फक्त सापळा उरला होता. त्यामुळे शहरात विविध चर्चांना उधाण आलं होतं. अंधश्रद्धेपोटी अघोरी प्रकार करण्यात आला आहे असं मत अनेकांकडून व्यक्त केलं जात होतं. या गुन्ह्याची माहिती मिळताच पिंपरी-चिंचवड शहराचे पोलीस आयुक्त कृष्णप्रकाश यांनी स्वतः घटनास्थळी धाव घेत या गुन्ह्याच्या तपासाचे आदेश दिले.