ఏపీ మంత్రులకు పవన్ కళ్యాణ్ ఫ్యాన్స్ సెగ
- 2 years ago
ఏపీ మంత్రులు కొడాలి నాని, పేర్ని నానిలకు పవన్ కళ్యాణ్ అభిమానుల నుంచి నిరసన సెగ తగిలింది. భీమ్లా నాయక్ సినిమా స్పెషల్ షోలకు ప్రభుత్వం అనుమతి ఇవ్వకపోవడంపై ఇప్పటికే పవన్ ఫ్యాన్స్ ఆగ్రహంగా ఉన్నారు. కృష్ణా జిల్లా గుడివాడలోని ఓ థియేటర్ ప్రారంభోత్సవానికి వచ్చిన మంత్రులను అడ్డుకునేందుకు అభిమానులు, జనసేన కార్యకర్తలు ప్రయత్నించారు. జై పవన్ కల్యాణ్, ప్రభుత్వ మొండి వైఖరి నశించాలంటూ నినాదాలు చేశారు. మంత్రులను అడ్డుకునేందుకు ప్రయత్నించిన వారిని పోలీసులు అరెస్ట్ చేశారు. దేశంలో ఎక్కడా లేనివిధంగా ఏపీలో పవన్ సినిమాను కక్షపూరితంగా అడ్డుకోవడం దారుణమని అభిమానులు ఆగ్రహం వ్యక్తం చేశారు. సినిమాటోగ్రఫీ మంత్రిగా ఉన్న పేర్ని నానికి వినతిపత్రం అందించేందుకు వచ్చిన తమను అరెస్ట్ చేయడమేంటని మండిపడ్డారు.