من جديد: وثيقة ويكليكس تنشر وثائق جديدة تتعلق بموقف مصر من سد اثيوبيا في عهد مبارك

اهلا و سهلا بكم
اللي يتلسع من الشوربة ينفخ في الزبادي
النهاردة كان فيه عدة اجتماعات في مجلس الشوري
قوم بعد الدوشة و ردود الفعل على إذاعة اجتماع الرئيس و الاحزاب في خصوص موضوع سد اثيوبيا
راح مجلس الشوري قرر منع الصحفيين من حضور اجتماعات لجانه اللى كانت بتناقش قانون الجمعيات الاهلية و مشكلة سد اسوان .
طب ده الناس كانت منزعجة من اذاعة لقاء ناقش مسائل الامن القومي المصري على الهوا
ايه علاقة ده بقانون الجمعيات الاهلية .. و هل قانون الجمعيات الاهلية امن قومي
و لا احنا بقي حنتلكك و نستغل الاجواء السائدة في فرض القيود على حرية تداول المعلومات .
امبارح كنا بنقول ما تبسطهاش قوي كده ... تعليقا على اذاعة اجتماع الرئيس على الهوا و هو بيناقش سد اثيوبيا
انما النهاردة بنقول له ما تقفلهاش قوي كده تعليقا على منع الصحفيين من نقل وقائع اجتماعات لجان مجلس الشوري
يا سادة يا كرام يا حكام مصر يا اهلنا و عشيرتنا الحياة مش " قفش" الحياة مش مقفولة قوي و لا مفتوحة قوي..
الحياة قواعد و الشفافية اصول و كل حاجة لها قواعدها ..
و بمناسبة كل حاجة لها قواعدها
النهاردة و يكلكس كشف الستار عن وثائق جديدة تتعلق بموقف مصر من سد اثيوبيا في عهد الرئيس السابق حسني مبارك
لو ثبت صحة هذه الوثائق فان لها دلالات بالغة اهمها و اخطرها ان الدول لما بتقرر اجراءات بتتحرك من غير دوشة الفرح ... و بتتصرف في هدؤ
علي كل حال النهاردة معانا فقرتين واحدة عن المخصصات المالية لرئاسة الجمهورية و اللى شهدت ارتفاعا خلال العام الحالي و حنعرف من ضيفنا الخبير الاقتصادي المعروف عبد الخالق فاروق ايه تفاصي انفاق الرئاسة و ايه حكاية الصناديق الخاصة اللى ماحدش يعرف عنها اى حاجة
البرقيات اللى نشرها ويكليكس كشف فيها عن ان الرئيس السابق محمد حسنى مبارك طلب من الرئيس السودانى عمر البشير إقامة قاعدة عسكرية صغيرة جنوبى الخرطوم، ليتمكن من مهاجمة أى منشآت مائية تعتزم أثيوبيا إنشاؤها على النيل الأزرق، لافتاً إلى أن الرئيس السودانى وافق على هذا الطلب وقتئذ .. معانا الخبير الاستراتيجي اللواء حمدي بخيت .. تابعونا على https://www.facebook.com/MenGadid