إمبارح أعلنت مستشفى قصر العينى وفاة صابرين علي، آخر شهيدة من شهداء جمعة الغضب 2011 في اسكندرية .. صابرين كانت تتلقى العلاج فى المستشفى طول السنتين اللي فاتوا قبل ما تخش في غيبوبة تامة .. صابرين انضمت لقائمة طويلة من الشهدا اللي عمالين يزيدوا يوم بعد يوم ومابيزودوش عندنا غير الحزن والغم على اللي احنا وصلناله في مصر ، وحالنا اللي بقى أسود من اي وقت فات ووصلت حالة الاحباط والغضب لاعلى حالتها .. وده طبعا عززة اللي حصل للمواطن حمادة صابر اللي وانا باشوف طريقة الرواية بتعته كأني بأشوف محاولة انتاج رخيصة لفيلم الزوجة التانية بتاع سعاد حسني وشكري سرحان وطريقة التلقين او حتى لو ما حصلشي تلقين نلاقي حمادة بيتكلم عن حاجة واحنا شايفين حاجة تانية ومحاولة الداخلية في الاول انها تلم الموضوع بالبلدي لكن الظاهر انه فرط منها ومبقاش قدمها غير الاعتذار الواضح والصريح على الواقعة اللي ما ينفعشي يحصل في مصر بعد الثورة .. زي ما برضوة كلنا لازم نعتذر للبلد على الحال اللي احنا وصلناه عشان محدش حاطط البلد ديه قدامه وكل واحد بيبص على مصلحته وللاسف الكل يستاهل صفر كبير سواء اللي حاكم لانه هو المسئول وهو اللي شايل الشيبلة وشاف ان الفرصة تاريخية عشان يقطف الثمرة من غير ما يبص انه يحط ايده في ايد المعارضة عشان يبني البلد وعمل الدستور اللي على مزاجه وبيعمل القوانين اللي على مزاجه دلوقتي ومش هامه اي حاجة وكمان المعارضة في ناس شايفة انها مسئولة برضوة عن جزء من اللي بيحصل .. سواء معارضة او حاكمين كلكم مسئولين قدام المصريين كلكم مسئولين قدمنا انكوا انتوا اللي حتضيعوا البلد .. للاسف احنا وصلنا لمرحلة مابقناش عارفين مين الصح ومين الغلط وصلنا مابقناش عارفين مين الشهيد ومين البلطجي وصلنا اننا لدرجة ان الثوار زي محمد الجندي من التيار الشعبي يتقال عليه بلطجي ونلاقي تصريحات المسئولين زي الدكتور قنديل يتكلم عن ان اللي في الشارع بلطجية يا ترى كلام زي ده تأثيره على اهم محمد حيبقى عامل ازاي على والدته ايه.. على العموم هي حتكون معانا النهاردة .. ونسمعلها ونطمن على محمد منها، بس بعد ما نخلص اخر اخبارنا.. واكيد طبعا اهمها قضية حمادة صابر .. والنهاردة النيابة العامة واصلت التحقيق في واقعة سحل المواطن حمادة صابر وواجهت حمادة بالفيديوهات المصورة ليه اثناء قيام رجال الشرطة بالإعتداء عليه بالضرب والسحل وتعريته ..لأن طبعا زي ما حضراتكو متابعين هو نفسه انكر ان يكون قوات الشرطة اعتدت عليه ... ياترى كان رد فعله اية وقال ااية ادام النيابة ... معانا عمر حسانين مساعد تحرير جريدة المصري اليوم .