Aa, ke wabasta haiN us husn ki yaadeiN tujhse Jis ne iss dil ko pari-khana bana rakha tha Jis ki ulfat meiN bhula rakhi thi duniya humne Deher ko deher ka afsana bana rakha tha
Aashna haiN tere qadmon se woh rahaiN jin par Us kii madhosh jawani ne inayat ki hai KarwaaN guzre haiN jin se usi raanaai kay Jis ki inn aankhoN ne be-sood ibaadat ki hai
Tujhse kheli haiN woh mehboob hawaaiN jin mein Uss kay malboos ki afsurda mehak baaqi hai Tujh pay bhi barsa hai uss baam se mehtaab ka noor Jis meiN beeti hui raatoN ki kasak baaqi hai
Tu nay dekhi haiN woh peshani woh rukhsaar woh honT Zindagi jin kay tasavvur meiN luTa di humne Tujh pay uTThi haiN woh khoii hui sahir aankheN Tujhko maloom hai kyuN umr ganwadi humne
Hum pay mushtarkah haiN ehsaan gham-e-ulfat kay Itnay ehsaan kay ginwaauN to ginwaa na sakuN Hum nay iss ishq meiN kya khoya hai kya seekha hai Juz teray aur ko samjhauN to samjha na sakuN
Aajizi seekhi, ghariboN ki himayat seekhi Yaas o hirmaan kay dukh dard kay maani seekhay Zeer dastoN kay masaaib ko samajhna seekha Sard aahoN kay rukh e zard kay maani seekhay
Jab kahiN beTh kay rotay haiN woh bekas jin kay Jin kay aankhoN meiN bilaktay huey so jaate haiN NatawaanoN kay niwaloN pay jhapaTtay haiN uqaab Bazoo tolay hue manDlaatay hue aate haiN
Jab kabhi bikta hai bazaar meiN mazdoor ka gosht Shah rahoN pay ghareeboN ka luhoo behta hai Aag si seenay meiN reh reh kay ubalti hai na pooch Apnay dil par mujhe qaaboo hi nahiN rehta hai
