بلدنا بالمصري: مشروع قانون الجمعيات الأهلية باللي ليه واللي عليه

النهاردة بدأ مجلس الشورى في مناقشة مشروع قانون الجمعيات الاهلية اللي قدمته الرياسة بذات نفسها ووصفته بانه "ثمرة من ثمار الثورة في طريقها الى النضوج" والهدف منه دعم دور هذه المنظمات وازالة العقبات الادارية، على أساس ان الدولة لا هي مسيطرة ولا هي بتسعى للسيطرة على المجتمع المدني.. دة الريس اللي بيقول.. ودة كلام جميل وكلام معقول كان ممكن ما نقدرش نقول حاجة عنه، غيرش بس ان ذات نفس الثمرة اللي في طريقها الى النضوج، وصفها عدد كبير من منظمات المجتمع المدني المصرية والدولية بالضربة القاضية للعمل الحقوقي في مصر.... لكن رجع رئيس لجنة التنمية البشرية في مجلس الشورى وقال في المؤتمر الصحفي النهاردة زي ما سمعنا كدة: إن مشروع قانون الجمعيات الأهلية سيكون «مصريا خالصا وطبقا لمصلحة مصر العليا ولن تملى علينا أي ضغوط خارجية لإخراج القانون وفقا للأهواء الخارجية»... وبالتالي السؤال اللي بيطرح نفسه خاصةً بعض الدور اللي لعبته منظمات ومجموعات وحركات ومبادرات وجبهات المجتمع المدني قبل الثورة وبزيادة من بعدها في الدفاع عن المعتقلين وحقوق الشهدا والمصابين والدفاع عن اصحاب الحقوق الاصيلة في السكن وفي الصحة وفي التعليم وفي حرية الرأي والتعبير وفي المعرفة وغيرها من الحقوق الاساسية والاصيلة لأي بني ادم على وش الارض خاصةً لو كان كمان بدرجة مواطن.. فالسؤال، بعد كل دة: ايش حال العمل المدني والحقوقي واحنا على وشك نقطف ثمرة قانون الجمعيات الاهلية؟!!! الثمرة ديه حلوة ولا مرة علقم.. دة السؤال اللي هنستعين عليه بضيوفنا النهاردة